Erê Efrîna min - Ebdilmecît Şêxo

29/5/2007

Erê Efrîna min

Ebdilmecît Şêxo

Cobarên xemgîniyên te

di bin lehiyên nalînên

dayika te de,

di newalên dilên me de

sêlroyekê bi firmêskên

zarên tazî,

bahozên bin lingên

dayikên pakrewanên

bajarê min

helbestên serxweş

dirêstin .

Cobarên xemgîniyên te

di rêyên çelexwarî de,

bi qaserî stêrkên ezmana

Zîna min

pêrgî darên sindiyanê,

zeviyên zeytonan tên.

bi hev re bi zimanê

"Çiyayê Kurmênc"

li ber pêlên çema "Arasê"

ya ku rojekê ji rojan

qehremanên Kurdistanê

li pişta xwe mîna fireşteyên,

dilên cangoriyan sîwar kiri bûn,

û li ser destên şaxên bênbuharî de

rwaestandin.

Cobarên xemgîniyên te

di ber tîrêjên çavên

jineke Kurd re diherikîn,

rûyên xwe bi sê rengan

di eniya "Çiyayê Lêlon " de çandin

û çend rûpel ji dîroka kela Horî

ji balêndên dilên cegerşikestiyan re

xwendin .

Cobarên xemgîniyên te

di nîva şevê de

li deştên bêhngenimî,

bêhnhenarî,

bêhnmêwên tirî

rastî govendên kotirên

basik birîn

hatin.

Cobarên xemgîniyên te

bi dilopên jinebiyên welatê min re

bi serbilindî ji xwe re

mîvanxaneyekê di devê hêvê de

ava kir .

Cobarên xemgîniyên min

xwe bi hilmên mindalên

"HELEBCE"

li ber bendergeha çavên bêzar

şuştin .

Cobarên xemgîniyên te

seqamên li ser piştên nûgihayên me

berfên li ser sînga destanên welatê min

herifandin

û rodankên nûh ji xwe re

bi dîdema stêrkan ava

kirin .

Cobarên xemgîniyên te

Siruda "Ey Reqîb" ji xwe re

kirin pîrozgeh,

rengên xwe bi ava kaniya "Basutê"

bi kenîna "Ednanê Cindo"

bi limêjên wî li ser miriyên bajarê xwe

dişuştin.

û di ezmanê keçên Efrînê de

fireşteyên dilên xemgîn

tîmar dikirin.

Cobarên xemgîniyên te

Îro hêştin ku keskesor

bi rondikên xwe awênan

Ji dîlbera min re ava bike.

Cobarên xemgîniyên te

bila Îro di 10 nîsanê de hestên xwe

bi şabûna Loriya ya rizgarkirî

bi rondikên bê guneh

xwe aşle bike

û bila çûkên çavên te

cîrokên dê û bavê di şevên zivistanê de

ji gulistanan re bixûnin.

Cobarên xemgîniyên te

bila di nav pîsîrên dayikan de

bi kenîn û giriyên sirûşta

deştên genimî

hêrên henaran

hêlanên pîrozî

çê kin .

Cobarên xemgîniyên te

dê rojekê li ber bayên lingên

dapîra min

û di nav lêvên gira "Endarê" de

HÛR, HÛR BIBIN.

Erê EFRÎNA min

Erêê ê .............................................. .

Tuttlîngên,15.04.2007

X. Loriya: Navê keça min e, ji roja dayikbûnê 27.04.2004 an ji aliyê malbetek Elman de hati bû zepkirin, lê piştî têkoşanên mezin ewa di 10 .04.2007 bi biryara dadgeha Stutgartê sernûva rizgar bû.