17/11/2007

LÊ LÊ BEJNFODILÊ

Xizan Şîlan

li gulîstana xewn û xeyalan

morî û mircanan

li gerdana dilê te

dineqşînim

ji pêta maçên lêvan

şerbeta gerdeka şevên te

vedixwim

li mestbûna bejna fodil

bextewariyê

dihûnim

wek zarokekî şîrve bûyî

xwe diavêjim

dest û ling û bextê te

bi lezeta awirên hesretkêş

hîqehîqa henasa gewriyê

diramûsim

ji pêsîra xemgîniyê

şîrê ken û şadiyê

dimijim

ez

li nav baxê bêdengiyê

guleke sêwî me

di giyana gerdûnê de

gerstêrkê bêrêgeh im

li dor şewqa çira odê

perperikê şevistana me

li nav mêrg û çîmenan

çemekî rût im

êşa giyanê xwe

dispêrim

bayê gulgenima porê te

li kolanên koçberiyê

li siya germa henasa te

digerim

di rêwitiya serdeman de

sembolê êş û keserê me

êdî bese were

bi kilîta dilovaniya xwedawendan

deriyê bihuşta dilê min

veke

çûka şaxa taristanên xwe

di sîngê asîmanê min de

bifirîne

rondikên nalînan

di doşeka qefesa xwe de

haş bike

li ser textê Cîhana min

bibe sultana stêrkên

asîmanê nava min

bi tîrêjên melûliya awirên xwe

kul û birînan

bikewîne

li çerxa aşe hêviyê

kîn û nefretê

bihêre

evîndarî

li hesreta bendewariyê

kal û pîr bû

firmêskên bîbikên çavên ziwa

bi xumîna şîpa kenê xwe

rawestîne

neynika dil

li seqema bêçaretiya demsalan

di koçberiyê de

kûd û şerpeze bûn

qêrîn

li wargeha awaza dil

qurmiçîn

pêjn

di bin lihêfa axînan de

qurifîn

were

westîbûna bîranînan

li seyrangeha payîzên xwe

vehesîne

şopa siya mirina min

bi sakoyê jana helbestan

bipêçe

di taldeya newaleke bêîman de

binixumîne

û straneke kezebşewat

di ferhenga destanan de

bilorîne

2007-07-07

Stockholm 

الصفحة الرئيسية | أخبار | جريدة الوحـدة | جريدة الوحـدة pdf | التقارير السياسية

بيانات وتصريحات |  مختارات | إصدارات | وثائق | شؤون المرأة | أدب وفن | الأرشيف | من نحن

Rûpela despêkê - Nûçe - Rojnama Newroz pdf - Daxuyan - Gotar - Wêje û Huner - Kovara pirs pdf - Agirî - Dûse - Em kîne

Despêk 6-ê Gulana 2004-an

copyright© 2004-2005 yek-dem.com [Newroz]