Helbest: Dê navê te bana

20/1/2008

Dê navê te bana

Kamran Simo

"Dê navê te bana" helbesta herî dawî a helbestvanê hêja, nivîskar Kamran Simo Hedili ye. Helbesta wî, ji awira êşa dila, evîndarî û hesreta yarê, têra xwe kur e û bi wate ye. Em helbesta dawî a Hedili bi we re pay dikin.

Çavên

şevê

di awirên seyê har de

li min dinêrin

Li min dinêrin

şevên gurî

ev şev

dojaha Dante ne

çirûska roniyê

di siya van şevan de nîne

hevok

di valahiya bêhnokan de

bêdawî dimînin

Peyv

di dêmên kaxizê de

dibin hibra sar

hezkirina min

dizanî

di rêzikên hê negotî de

kenê te

di dilê min de

bihar e

kenê te

şabûna kulîlkên rojê

di dilopên xunava wan de

hêlîn çêkirî

û germkirina hêviyên min e

min zanîbû

bikenim

çêja mizdana dêmên min

di nav destên te de ken bû

min zanîbû

bikenim

ken

di rondikên derya dagirtî de

winda bû

di zîldana rayên kîjan gulê de

stêra sibehê dê derê

di kîjan asoyî de

roj dê werê

vê kêliyê

a niha

dema

girî di nava min de

digirî

eger

ev helbesta min

a dawî bana

dê bi hesret

xemgîn

dûrî têgihiştina aqil

û hemû

dê peyvek bana

ew peyv

dê navê te bana

Kamran Simo Hedilî kî ye

Hedilî, di sibata 1955 de li gundê Hedilê ya bi ser navça Hezexê hate dinyayê. Di zaroktiya xwe de mala xwe bar dikin bajarê Batmanê. Di temenê ciwaniyê de dikevê nav tevgera azadiya Kurdistanê. Ji terefî dewlata tirk ve, du caran tê girtin. Di cunta eskerî ya 12.10. 1980 de bi hevalên xwe re derbasî Rojavayî Kurdistan û Lubnanê dibe. Xabata xwe li Rojavayê Kurdistanê didomîne, li wir jî ji terefî dewlata Surî ve têgirtin. Di amadekarî û xabata 15 ê tebaxa 1984 an a çekdarî de ji nû ve di nav tevgerkirina gel li Bakurê Kurdistanê cihê xwe digire. Li Rojhilatê Kurdistanê ji terefî dewlata Îranê ve jî tê girtin. Kamran Simo Hedilî, li her çar parçên Kurdistanê, hem di nav xabata tevgerkirina gel de û hem di nav xabata artêşê de cihê xwe digire. Ji 1982 ve dinivîse, pêşî bi tirkî dinivîsî. Piştre bi kurdî dest bi nivîsandinê kir. Bi kurdî kurteçîrok, helbest, destan û lêkolînên wî di rojname, kovar û malperan

de hatine weşandin. Kamran Simo Hedilî, endamê Pena Kurd a navnetewî ye. Vêga di rêvebariya Înstutyiya Kurdî li Stockholm xabata xwe didomîne. Çar pirtûkên wî yên çapbûyî hene: Lorîna pênûsê, helbest, Civata giyanan, kurteçîrok, Ji Enfalê şeveke bêsibe, destan, Min deng kuştin, helbst. Du pirtûkên wî li ber çapêne: Helbest çi ye? lêkolîn li ser danasîna helbestê û Kîjan kulîlk çavên te ne?

Zarathustra News - zarathustra_news.comhem.se