Cûdî dişewite… û jibermayiya gemiya Nûh

15/7/2006

Cûdî dişewite… û jibermayiya gemiya Nûh

Hêmin Kurdaxî

Rahêje leylana bêhna gangulîlkan

Xweda me dikuje, em pêximberan didn zayîn

Îro çiyayê Cûdî dişewite

Duh jî şewitî…

Hê jî… dişewite

Îro… jibermayiya gemiya Nûh û

Dilê şaristaniyê dişewite

Bi navê aramiyê; ne aram dikin

bombe dikin…

Ma jê aramtir heba

Xweda bi xwe

gemiya Nûh; pê hildipesart?!!

Em zanin ku, tu serî danaxe

Ne jî Gebar û Besta…

Lê çivîkên xwe şiyar bikin

Bila bifirin…

Dibe ku;

Bi bayê baskên wan agir vemire

Xezalên çolan, kêvroşkên berqefan

Mar û mişkên qulik û bin keviran

Bila di xew de nemînin

Bila Kurdax û Toros

Metîna û Hemrîn , Ararat

Seranser çiyayên cêwî agahdar bikin

Û bêjin:

Va ye şewat….

Wek şewata Qamişlo, Amûdê û netebata Zîbarî, Kawa û Meşûqê we

Em tên şewitandin

Wek şewata Helepçe, Raniya,

Babagurgur, û Fîxana Şêx Mehmûdî, Xesrewî, Barzaniyê we

Em tên şewitandin

Wek şewata Mihabad, Sine, Senendec , çarçirayên we

Hawara Qadî Mihemed, Qasimlo, Şeref Gundî yê we

Em tên şewitandin

Ma kevok û qumriyên dilnenaz

Ji bo kîjan dijminatiyê difirîn!!

Ma ji bo kîjan mirinê

Tivîrk, Şalûr û Bilbil dixwandin!!

Ma tîna şewatê tê we

Ma bêhna kizira dilê şaristaniyê tê we

Hê…êy paytextên mijê?!!

Bila tu zani bî hey „Alp“, ê serbilind

Mîna…

Berfa sînga te, dilê me tê sotin

Mîna…

Daristanên bejna te em xemgîn in

Wek

Baranên rûyê te giriyê me tê

Lê…

Wek çemê “Rhein” û “Sînê” …

Xwîn di damarên me re diherike

Em tên şewitandin

Hê…êy cêwiyên minî yên şaristaniyê

Cûdî dişewite

Stêrk vedimrin

Komkujiya zarokên çiya ye

Cûdî dişewit e

Dûman êrişî asîmanan dike

Li ser dilê xweda ditirsim

Vê kêlîkê

dilê xweda

Ji bo kîjan olî lêdixe!!

Li ser gora pêximberan ditirsim

Vê kêlîkê, giyanê wan

Kîjan Pirtûkên pîroz dixwînin?!!!

Ma Ogir* ji wan re negot;

Ku min çardeh bihar bê keskesor dîtin

negot ku;

Di welatê rojê de

Min çardeh sal;

Tarî, tarî û bê roj derbas kirin

Ez çardeh salan;

Di welatê Dicle û Feratê de

Tî mam

Bi hêsir lorîkên dayîka xwe mezin bûm

Ogir ma te negot;

Ji nav hemû mirov û welatan

Xwediyên welatê rojê

Neviyên Mezopotamiya

Penaberên bê sînor û bê ziman man

De bişewite Cûdî… û bi te re jî

Gebar û Besta…

Ogir jî bi wan re negot!!

Bila dilê xweda bi şewatên we hênik bibe

Bila giyanê pêximberan,

Bi dilaramî pirtûkên xwe ên pîroz bixwînin

de bişewite.

*Ogir : ciwanekî Kurd çardeh salî bû, li gundekî Kurdistanê hat binçav kirin, pişt re li çolê mirî û îşkence kirî hat dît in.

24. 06. 2006 Vechta( Almaniya)