Banga PEN a Swêdê ji Hikûmeta Îranê re: Hevalên me yên girtî berde!

6 /9/ 2007

Banga PEN a Swêdê ji Hikûmeta Îranê re: Hevalên me yên girtî berde!

(Zarathustra News).

PEN a Swêdê îro ji bo piştgiriya rojnamevanên kurd Adnan Hassanpour û Hîwa Butîmar daxuyaniyek belav kir. PEN a Swêdê ku di komîteya xwe a karger de Nivîskarê Kurd Firat Cewerî jî heye, di daxuyaniya xwe de banga xwe dighêjîne rejîma Îranê û ji wan dixwaze ku rojnamevanê kurd bêne berdan. Daxuyaniya PEN a Swêdê ku ji aliyê Serokê wê Björn Linnell û Sekreterê Navnetewî Ana Valdes ê ve hatiye îmzekirin wisan e:

Hevalê me yên zîndanîkirî berde!

Li hemberî protestoyên navnetewî rojnamevanên kurd Adnan Hassanpour û Hîwa Butîmar hîna jî zîndanî ne û cezayê îdamê ji wan re tê xwestin. Herdu kes di 17 tîrmehê de bi casûstiyê hatin tawanbarkirinê û ji wan re cezayê darvekirinê hate xwestin. Hassanpourî wek neyarê Xwedê jî hatiye sucdarîkirin. Lê di eslê xwe de sucê wan ew e ku, ji bo amadekirina kovara Horizons ê xebat kirine. Horizons bi kurdî û farisî tê weşandin.

Paşê herdu kes di dawiya sala 2006 an de hatin girtin. Butîmar û Hassanpour hatin îşkencekirin û îfadeyên wan di bin mercên xirab de hate girtin. Butîmar û Hassanpour, sucên ku pê têne tawanbarkirin napejirînin. Sucê wan ew e ku, wan mafê xwe yê çapemeniyê û hizirkirina azad bikaranîne.

Em PEN a Swêdê li gel dezgehên navnetewî bang dikin ji rejîma Îranê re ku, hevalên me yên zîndanîkirî berdin, azad bihêlin .