Daxuyan - Saziya parastin û fêrkirina zimanê Kurdî li Sûriyê

2/12/2006

Daxuyan

Piştî xebateke dûr û dirêj ( bêtirî pazde salan ), di warê fêrkirin û parastina zimanê Kurdî de , weke girêdana gelek civatan , fêrkirina bi sedan gelê me yê Kurd, çi bi alfebê yan rêziman û li sazkirina pirogrameke fêrkirinê ; Ramana avakirina saziyekê, ji fêrkirina zimên li Sûriyê û çêkirina tozikekê jê re , derket holê û xwe bi pêwîstî avêt meydanê .

Ji ber wê û ta ku, ew raman ronî û jiyanê bibîne , reşbeleka tozika vê saziyê hate amedekirin û piştî şirovekirina wê reşbelekê di du civatên fere de , bi beşdariya gelek mamostên zimên ji seranserî herêmên Kurd û bajarên ku Kurd lê dijîn , li 3\4\2006 an de – cara yekê li seranserî Kurdistanê – biryara bi damezrandin û ragiyandina SAZIYA PARASTIN Û FÊRKIRINA ZIMANÊ KURDÎ LI SÛRIYÊ hate standin. Gelo ! Ji ber ku , zimanê me hebûna me û merca yekîtiya gelê me ye û ji ber ku , tu rêdan fermî ji aliyê destlata Sûriyê ve , ji bo fêrkirina wê tune ye û bervajî wê qedexekirina wê heye , vêca banga me ji gelê me , tevgera me ya Kurd , dostên gelê Kurd re , ewe ku , piştgirî û alîkariya vê saziyê bikin û wê biparêzin .

Hêjaye em we agahdar bikin ku, roja 4.8 . 2006Z – 2618K-an , roja girtna çar mamostên zimanê kurdî , ji aliyê destlatê ve , bû roja mamosteyên zimanê kurdî li Sûriyê .

29/11/2006

- Bijî gelê Kurd .

- Herbijî zimanê Kurdî .

Saziya parastin û fêrkirina

zimanê Kurdî li Sûriyê

SPFZK

*****************

Saziya fêrkirin û parastina

Zimanê kurdî li Sûriyê

Zimanê Kurdî li rojhilata navîn , yek ji zimanên kevnar e . Ji hezar salan ve , bawerî, raman,adet,folklor ….. û hebûna gelê Kurd parastiye . Bi sedan dîroknivîs , helbestvan û nivîskaran , ew bi kar anîne . Lê mixabin , ji destpêka sedsala bîstan ve , gava nijadperestan xwestin miletê Kurd tune bikin; Berî giştî dest avêtin zimên û karanîna wê qedexe kirin .

Li Sûriyê jî , helwesta rijîmê di tenga zimanê me re, qedexe û tunekirin e . Ji ber wê jî , ji her kurdekî tê xwastin li hember wan pîlanan raweste û pûç bike .

Avakirina Saziya me , ji bo em kanibin di warê fêrkirin û parastina zimanê dê de , bi rêk û pêk bixebitin .

1.Armancên Saziyê :

a. Piştgiriya axaftin û peyvandina bi zimanê dê :

Di vî warî de , têvedana gelê me yê Kurd berve bikaranîna zimanê zikmakî bi hev re , li şûna zimanên dî ( di riya çalakiyan re ) .

Fêrkirina xwendin û nivîsandina bi kurdî :

Ev jî wê bi hemî şêweyên gengaz bê xebitandin { kors , CD …. )

2.Avakirina Saziyê :

a.Komîteyên mamosteyan:

Ew ji mamostên alfabê û rêzimên pêktên , û stubariya wan fêrkirina zimanê dê ye ( alfabê , rêziman , xwendin , nivîsandin …..û H. W. D ).

b. Komîteyên herêman :

Li her herêmekê komîtak, ji nav mamosteyên zimanê kurdî, yên wê herêmê were hilbijartin . Bi şêweyekî rêkûpêk bicive û salê carekê komcivînekê ji mamosteyan re li dar bixe , têde kar û bar werin nirxandin , pilanên nû werin danîn û komîteyeke nû were hilbijartin .

c. Komîteya rêvebir ya giştî :

Divê komîta rêvebir ya giştî, ji pênc kesên hilbijartî avabibe , dudu ji parêzgeha Hesekê , dudu ji Helebê û yê pêncan ji Şam . ew ji nav komîteyên herêman yên her parêzgehekê tê hilbijartin . Komît bi awakî demkî dicive û rêvebiriya karê saziyê li dirêjiya salekê dike .

3.Stubariyên komîteyên herêman :

-Bicihkirina pêdiviyên fêrkirinê , mîna : Mamoste , pirtûk , pere ….

-Birêkûpêkirina fêrkirin û parastina zimên .

-Bicîhanîna biryarên saziyê .

-Her komîtek kane li gor rewşa xwe bixebite .

-Li gor armanca saziyê, têkelî û pêwendî bi zimanhez û fêrkarên zimên, yên derveyî saziyê, di herêma xwe de .

- Têkildarî bi komîteyên mamostan re .

4.Stubariyên komîta rêvebir ya giştî :

-Têkeliyên ji bo zimên bi derve û hundir welêt re .

-Hevgirêdana komîteyên herêman bi hev re .

-Girêdana konfiransên giştî, ji bo zimên ,bi alîkariya komîteyên herêman, li gorî hewcedariyê.

- Xwedîderketin li girtiyên zimanê kurdî .

5.Diraviya saziyê :

Her komîtek herêmî, di diraviya xwe de serbixwe ye . Lê xerciya komîta rêvebir, ji diraviya komîteyên herêman e.

Çavkaniyên diraviyê :

-Alîkariya hemî dostên Kurdan .

-Camêrî û alîkariya welatiyên Kurd.

-Alîkariya partiyên Kurd .

-Alîkariya saziyên zimên li welêt û derve .

-Firotina pirtûkan .

29/11/2006